Eusko Jaurlaritzako Lurralde Plangintza, Etxebizitza eta Garraio Sailak “alokabizi: alokairu sozialeko etxebizitza babestuen eredu berri baterantz” jardunaldia antolatu du, zerbitzu publiko gisa, IKEIren laguntzarekin

IKEIk laguntza teknikoa ematen die Alokabideri eta Eusko Jaurlaritzako Etxebizitza, Lurzoru eta Arkitektura Zuzendaritzari alokabizi proiektuaren kudeaketan, antolaketan eta jarraipenean, eta proiektu horren aurkezpen-jardunaldia antolatzen ere lagundu du, joan den otsailaren 15ean, Euskadiko Arkitektura Institutuan.

Jardunaldian, Alokabide sozietate publikoak kudeatutako etxebizitza-parkerako aurreikusitako alokairu sozialeko etxebizitza babestuaren eredu berria aurkeztu zen. Alokabizi proiektuaren baitan garatzen ari da.

Gainera, aurkezpenaren amaieran, Autonomia Erkidegoetako Etxebizitzako Zuzendari Nagusien bilera egin zen, Garraio, Mugikortasun eta Hiri Agenda Ministerioak bultzatuta. Bilera horretan, Europar Batasunak finantzatutako Berreskuratze, Eraldaketa eta Erresilientzia Plana (Next Generation EB Funtsak) hedatzeari buruz hitz egin zen.

Alokabizi Etxebizitza, Lurzoru eta Arkitektura Zuzendaritzak eta Alokabide Sozietate Publikoak bultzatutako proiektua da, Eusko Jaurlaritzaren Zientzia, Teknologia eta Berrikuntza Planaren esparruan. Euskadiko bizitegi-eraikuntzaren eta -birgaitzearen sektorearen eraldaketa bultzatzea du helburu, alokairu sozialeko etxebizitza babestuen eredu berri baten bidez, pertsonen zerbitzuan eta ongizatean oinarrituta.

Alokabizik 3 ardatz (jasangarritasuna, digitalizazioa eta inklusioa), 9 ikerketa-ildo eta 27 ekintza estrategiko dituen esparru estrategiko bat osatzen du, gutxienez 90 pertsona biltzen dituzten 30 lantalderekin, eraikuntzaren, ingeniaritzen, telekomunikazioen, sektore akademikoaren edo berrikuntzaren munduko profesionaletatik.

Laguntza teknikoan, IKEI da alokabizi-ren ikerketa-ildoak eta ekintza estrategikoak garatzen ari diren lantaldeen koordinazio, kudeaketa eta jarraipenaren arduradun nagusia.